الدوم مدارس و مذاهب
قدام كل باب مدرسة في الستينات والسبعينات بائع سعادة، عن عربة الدوم واللب والسوداني والحرنكش اتحدث.
نطلع من المدرسة وفي جيبنا القرش صاغ اللي حنشتري بيه.
عملية انتقاء الدومة كانت معقدة جدا، فهناك مدارس ومعايير تحكم هذا.
نكتشف سريعا ان الدوم ثلاث انواع، عندك النوع الغامق دا بيكون ناشف و الشعر جاف ومر الطعم، يفكرك بالشكولاتة الغامقة.
و نوع لونه وسط بس ساعات يبقى شعره لازق بشدة في البذرة و ده طعمه بيبقى حامض شوية و مسكر، طبعا يدخل بين الاسنان و تقعد اسبوع تسلكه
النوع الثالث بقي دا الحتة المرسيدس، دوم برنس في نفسه، القشرة طرية وله ريحة حلوة مميزة
انت لازم تكون عارف انت عاوز ايه وانت بتشتري، ما ينفعش حد ينقي لك الدوم، لازم انت تتفاعل مع كومة الدوم و تتفحص كل واحدة ، ودايما نصيبك حايجيلك.
ولو مش واثق ممكن تدوقها، علي السكين زي البطيخ.
اختار بنفسك ، زي نظرية جواز الصالونات كده.
كيفية اكل الدوم برضه له اصوله و مدارسه.
في اللي يحب ينحتها حتة بحتة
وفي اللي يحب يكسر القشرة كلها مرة واحدة.
طبعا ايا كانت طريقة الاكل لازم نص الشعر يدخل بين اسنانك و تقضي بقية اليوم بتسلك
حاسس اني بوصف دومة ولا منجة
—-
في حد عرف يكسر البذرة؟
اذكر اداة الكسر
اوصف ماوجدت داخل البذرة
كسرتها ليه اساسا