ذكريات لم تمت
الجردل الاحمر و المايوه الأزرق ابو شراشيب
طفل ستينات سكندري برىء فتاك، النسخة المعدلة بدون رتوش وبدون تعديلات. يقول لأمه :
ماما انا عايز مايوه جديد ..
بس كده ياحبيبي .. افصل لك مايوه!
نعم؟ بتهزري صح؟ اصحابي كلهم بجيبوا مايوهات جديدة كل سنة من محطة الرمل.
بس ياولد .. قلت لك حاعملك واحد ..
يقوم الواد العفريت يمسك التلفون ويطلب جدته الست فوزية و يشتكي لها.. ماما عايزة تفصل لي مايوه..
وتضحك الجدة الطيبة و تطمنه انه حايكون احسن مايوه..
اسبوع وكان طفلنا المشاغب لابس مايوه ازرق بشراشيب من الجنبين ويروح البحر مع اصحابه و معاه الجردل البلاستيك الاحمر ..
حاول ان يتجنب مضايقات اصحابه و تعليقاتهم علي المايوه ابو شراشيب.
وبرغم كل المايوهات اللي مرت علي طفلنا في حياته.. يبقي هذا المايوه ابو شراشيب عالقا في ذهن طفلنا وهو قد قارب علي عامه الستين