انت عارف فين صندوق ذكرياتك؟
انت عارف فين صندوق ذكرياتك؟
ذلك الصندوق الخشبي القديم اللي فيها ذكريات ماتهمش حد غيرك..
كل واحد منا عنده صندوق.. مكانه في خيالك.. بين ودانك .. محدش غيرك يارف يفتحه..
تعالي كده جرب تغمض عينك وتدور علي الصندوق الخشب..
لقيته؟ افتحه ومايهمك التراب اللي جواه
مد ايدك كده .. فاكر الوردة دي؟ مجففة بين طيات كتاب الفلسفة.. فيها عبق الزمن .. راح كتاب الفلسفة وبقيت الوردة المجففة .. يمكنماتفتكرش مين ايدها لك بس المهم انها هنا شاهد علي تجربة ما..
الاستيكة الملونة .. مين عضها عشان كانت بريحة الفراولة.. راحت ريحتها لكنها موجودة
شاهد علي مرحلة دراسية ما
شوية صور قديمة ابيض واسود في رحلة شبابية للمنتزة ..
مش مهم مين الناس اللي في الصورة… يمكن تفتكر واحد او اتنين دول اللي كملوا المشوار معاك ..
الصور هي شاهد علي رحلة ما
شايفك حطيت ايدك علي شريط كاسيت ساعتين مكتوب عليه (old is gold) .. حتلاقي عليه كوكتيل اغاني ديميس روسوس علي بول انكاوباري وايت..
يمكن معندكش جهاز تسجيل حاليا تسمع الاغاني دي
لكنها دايرة في دماغك وبنفس ترتيبهم علي الشريط العتيق
شاهد علي مرحلة غنائية ما
الكراسة الصغيرة دي هي شهادة نجاحك في احدي السنوات. افتحها حتشوف تعليقات مدرسينك الاجلاء علي مستواك العلمي..
اراهنك حتلاقي في احدي الصفحات امضاء ابوك اللي انت زورته لما سقطت في احد الشهور … فاكر نظرته ليك لما اكتشف؟
اكيد فاكر قرصة ودنك ..
الكتيب دا شاهد علي حب غارف من ابوك
سيب الورقة المطبقة دي .. ماتفتحهاش
حتلاقي فيها قلب مرسوم بقلم رصاص و طالع منه سهم كيوبيد و مكتوب عليها اول حرف من اسمك و حرف من اسم من اهدتك الورقة..
شاهد علي حب عذري طفولي لطيف
ماتنساش بقي تقفل صندوق الذكريات و ترجع له كلما اشتدت حاجتك لذكرياتك ..
قبل ان يمر الوقت ولاتستطيع استرجاع هذا الصندوق السحري
#برديسيات
#جلدة_الكتاب